સાગરમાં નાવ મારી. . .

સાગરમાં નાવ મારી સરરર જાય,
કાંઠે ઉભા ઝાડ કેવા નાના નાના થાય. . .
સાગરમાં નાવ મારી. . .

દૂર દૂર પંખીઓનો કલરવ થાય,
સમીરની મંદ મંદ વાંસલડી વાય. . .
સાગરમાં નાવ મારી. . .

સફેદ સઢમાં કેવો પવન ભરાય,
હલેસું મારુંને નાવ દોડી દોડી જાય. . .
સાગરમાં નાવ મારી. . .

ઉંચે ભૂરું આકાશ શું વિશાળ જણાય,
નીચે કાળા કાળા પાણી દેખ્યાં નવ જાય. . .
સાગરમાં નાવ મારી. . .

તોફાનમાં નાવ મારી ડગુમગુ થાય,
પ્રભુને સ્મરું તો નાવ સરરર જાય. . .
સાગરમાં નાવ મારી. . .